న్యూఢిల్లీ, సెప్టెంబర్ 27: జీత భత్యాల విషయంలో ఇకపై ఎంపీల సొంత నిర్ణయాలు సాగవు. తమ ఇష్టానుసారం వీటిని పెంచుకోవడంపై విమర్శలు వెల్లువెత్తుతున్నాయి. రాజ్యాంగంలోని ఆర్టికల్ 106, 1954 నాటి చట్టం ప్రకారం ఎంపీలు తమ జీత భత్యాలను సవరణల ద్వారా ఎప్పటికప్పుడు నిర్ణయించుకునే వీలుంది. ఇలా ఇప్పటి వరకు పలు సార్లు వాటిని పెంచుకున్నారు. 2010లో ఎంపీల జీత భత్యాలను ఏకంగా మూడు రెట్లు పెంచే బిల్లును ఉభయ సభలు ఆమోదించాయి. అప్పటి వరకు నెలకు 16 వేలు ఉన్న సభ్యుల జీతం ఒక్కసారిగా 50 వేలకు పెరిగింది. అంతేగాక సభలు, హోస్ కమిటీ సమాశాలకు హాజరయ్యే వారికి రోజుకు రెండు వేలు చొప్పున భత్యం చెల్లిస్తారు. అలాగే ప్రతి ఎంపీకి నియోజకవర్గానికి 45 వేల చొప్పున ప్రతి నెల కేటాయిస్తారు. స్టేషనరీ కోసం 15 వేలు, వ్యక్తిగత సహాయకుల నియామకం కోసం మరో 30 వేలు కూడా అందుకుంటారు. వారి వసతి, విమాన, రైలు ప్రమాణంతో పాటు ఫోను ఖర్చులను కేంద్రమే భరిస్తుంది. అంతేగాక వాహనం కొనుగోలుకు 4 లక్షల రుణం కూడా లభిస్తుంది. ఇలా ప్రతి ఎంపీకి నెలకు లక్షల్లో జీత భత్యాలు అందుతున్నాయి. దీనిపై ప్రజలతో పాటు అన్ని వర్గాల నుంచి తీవ్ర విమర్శలు వెల్లువెత్తుతున్నాయి. దీనిపై సమీక్ష జరపాలనే డిమాండ్లు ఊపందుకున్నాయి. మరోవైపు ఇటీవల బీజేపీ ఎంపీ జోగి ఆదిత్యనాథ్ నేతృత్వంలోని ఇంటర్ పార్లమెంటరీ ప్యానెల్.. ఎంపీలకు వంద శాతం జీతాల పెంపుతోపాటు భారీగా భత్యాలు పెంచాలని ప్రతిపాదించింది. అయితే ప్రజల నుంచి మరింత విమర్శలు వస్తాయని భావించిన ఎన్డీయే ప్రభుత్వం వాటిని పక్కన పెట్టింది. జెనివా కేంద్రంగా ఇంటర్ పార్లమెంటరీ సంఘం నిర్వహించిన సర్వేలో పలు ఆసక్తికర విషయాలు వెల్లడయ్యాయి. ప్రపంచ వ్యాప్తంగా ఉన్న 104 పార్లమెంట్లలో సగం చట్ట సభలు తమ సభ్యుల జీత భత్యాలను తామే నిర్ణయించుకుంటున్నాయి. మిగతా 50 శాతం దేశాల్లో ప్రభుత్వం లేదా ఆ దేశాధినేత వీటిని ఖరారు చేస్తారు. ఈ నివేదికతో కేంద్రం పునరాలోచనలో పడింది. ఎంపీల జీత భత్యాల కోసం ఓ స్వతంత్ర కమిటీ ఏర్పాటు చేయాలని భావిస్తోంది. ముగ్గురు సభ్యుల పే కమిషన్‌ను ఏర్పాటు చేయాలని పార్లమెంటరీ వ్యవహారాల మంత్రిత్వ శాఖ నిర్ణయించింది. వచ్చే వారం విశాఖలో జరగనున్న రెండు రోజుల అఖిల భారత విప్‌ల సమావేశంలో దీనిపై చర్చించనున్నారు.